Þið eruð ekki róttæk

Útvarpsstjóri (sís karl) er sigurvegari Kvennaverkfallsins

Róttækur forsætisráðherra vor hefur talað: Það eru greinilega 300 ár fram undan af „jafnréttisbaráttu“ enda sjá sérfræðingar ekki fram á að jafnrétti kynjanna verði lokið fyrr en þá, miðað við núverandi gang.

Þetta segir forsætisráðherra í snilldarlega uppstilltu viðtali við Stefán Eiríksson útvarpsstjóra sem hefur „hlaupið í skarðið“ fyrir Sigurlaugu M. Jónasdóttur á Rás 1, af því að Sigurlaug er farin í kvennaverkfall. 

Ef punkturinn með verkfalli er að lama vinnustaðinn, hefur þá ekki útvarpsstjórinn unnið fullnaðarsigur hérna? Hann fær ekki aðeins að eyða áhrifum verkfallsins, heldur er honum hampað sem jafnréttishetju á meðan hann er að því.

Stefán Eiríksson við Katrínu Jakobsdóttur: „Til hamingju með daginn og til hamingju með þá miklu samstöðu sem við blasir á þessum áhrifamikla degi.“ Ritstjórinn: Getum við plís haft eldvegg framvegis á milli útvarpsstjóra og forsætisráðherra til þess að hafa áróðurshlutverk ríkismiðilsins ekki svona grátlega augljóst?

Nokkrir mjög sís karlar hafa í aðdraganda kvennaverkfallsins ofpeppast svolítið, samanber auglýsingabrellu besta manns á Íslandi Haraldar Þorleifssonar. Þar ætlaði Halli að láta ofurhæfa listamenn og ríka meistara ganga í störf lúserakvenna á veitingastaðnum sínum til að sýna hvað karlarnir væru krúttlegir klaufar að þjóna til borðs.