Rofið við raunveruleikann

Ritstjórinn hefur samúð með þjáningarbróður sínum í Silfrinu, en auðvitað hefur RÚV ekkert raunverulegt almannavarnahlutverk á 21. öld. Einnig: Háfreudískt tíst sonar útvarpsstjóra

Bergsteinn gat ekki sleppt takinu af pólitíkinni. (RÚV)

Eftir því sem lýðræðið tekur æ meira á sig mynd tækniræðis eða snjallræðis fara okkar gömlu góðu kerfi að láta á sjá, þótt við séum lengi að horfast í augu við það.

Þriggja kílómetra löng gossprunga opnaðist í mikilli nálægð við byggð í gærkvöldi og háir strókar þeyttust langar leiðir, eins og sjá mátti strax af fyrstu myndum á samfélagsmiðlum.

Svo vildi til að þegar þetta byrjaði var Silfrið í beinni útsendingu á þessu mánudagskvöldi, sem er við fyrstu sýn einstakt tækifæri til þess að svala áhuga áhorfenda á hverri einustu upplýsingaglefsu sem býðst í blábyrjun slíks stórviðburðar.